السلام عليكم و رحمة الله و بركاته
أكيييييد العديد منكم اللي ما سألو عني ههههههه إلا ما يكونو لاحظو على الأقل غيابي عن المنتدى ..
و طبعاً السبب مانو الامتحانات .. لأني ما عندي امتحان و لا شي .. بس كان عندي امتحان صبر ..
هههههههه
لأحكيلكم شو صار معي :
بالنسبة لألي كنت أتصل بالانترنت عن طريق الهاتف الأرضي العادي .... بسرعة تصل في أحسن الأحوال إلى 48 كيلو بت في الثانية ..
بت مو بايت .. لأن البايت = 8 بت .. و لهذا السبب بتلاقي أن سرعة التحميل أو الدونلود أصغر بكتير من سرعة الخط ....
و بعد افتتاح المنتدى .. ركبت خط ISDN .. وصارت السرعة ثابتة 64 كيلو بت في الثانية .. ( 64 كيلو بت ÷ 8 = 8 كيلو بايت و هذه سرعة التحميل عندي )
طبعاً بعد ما سمعت أنه أفضل و أسرع و ما في شي أسمو خط مشغول .... !
بس هالحكي ما في حمص .. في حمص نحنا منعمل المستحيل .. حتى لو كان مضر لألنا هههههههههه
و مقسم الهاتف المسؤول عن توفير الانترنت لحضرتنا هو مقسم وادي الذهب .. اللي صار معروف بجودة خدماته و قلة مشاكله ..
و بعدين صار الاتصال بالانترنت محصور قبل الساعة 10 ليلا أو بعد الـ 1 ليلا .. لأن الفترة بينهم بكون الخط مشغول بشكل كبير جداً .. و احتمال أني ألقط خط هو 1 بين 100 محاولة ..
بدأت مع الجمعية العلمية السورية .. اشتراك شهري مفتوح ..
المفاجأة تكمن بأن ثبات السرعة جيدة على مدار اليوم .. لكن كان يعطوني 2 أي بي أثناء الاتصال و كل شوي بيعطوني أي بي جديد و بهذه الحالة بيفصل المسنجر و المنتدى و كل المواقع اللي عامل تسجيل دخول فيها .. و في هذا المنتدى إذا في 2 أي بي بيعمل تسجيل خروج مباشرة .. بيعتبر صارت سرقة , مشان الحماية .. و بالمتصلون الآن بلاقي حالي في مكانين مختلفين على الخريطة ..
غيرت الاشتراك .. و جبت Runnet .. اللي اتفاجأت أن لوحة التحكم في المنتدى محجوب منها أكواد !!!! .. بس كانت بتعطيني أي بي واحد ثابت طول فترة اتصالي .. يعني ما في تسجيل خروج مفاجئ ..
و بالفترة الأخيرة التي سبقت انقطاعي عن النت .. صار لازم كل يوم شغل الكمبيوتر و اطلب الاتصال و اتركه يحاول إلى ما شاء الله .. يعني لحتى يحن علي المقسم و يعطيني خط ..
المهم ..
بيجي عرض من شركة تانية .. TeraNet .. عندن 10 بوابات ADSL في مقسم وادي الذهب ..
رغم السمعة السيئة جداً لخطوط ADSL الطالعة من وادي الذهب .. إلا أني سجلت على بوابة ..
و لكن بنفس النهار بيرجع لعندي المندوب و بقللي طلعو البوابات محجوزين من الشام .. من الصبح !. بس هلأ لوصلتو النشرة ! .. يعني ما في بوابة ! ..
بس طلع هالشي من مصلحتي آخر شي .. لأن اللي أخد بوابات .. مبسوط كتير بسبب الرياضة اللي بيعملها لأن كل شوي بيعمل ريستارت للمودم مشان ياخد خط ..
و السرعة أبداً ما جيدة ..
و أنا عادي .. الـ ISDN جيد و ثابت أكتر من غيرو بألف مرة ..
و لكن فجأة بينقطع الخط .. !
تاني يوم بروح عالمقسم و بقولو الخط بيتصلح بكرة << هالحكي كان الأربعاء
الخميس ما صار شي . ! و ما فضيت تابع ...
يعني راحت ما بعرف لأيمت .
و السبت بتوصلني مفاجأة .. الخط اشتغل .. بس عليه فاتورة .. تم توقيف الخط
فأنا طقت براسي البراغي ..
و انضربو البوجيات ..
حملت حالي و رحت عالسوق .. و اشتريت خط 3G... بدون عرض و بدون شي ..
حق الخط 1750 ليرة
و 1 غيغا بـ 1500 ليرة
يعني 3250 ليرة فقط لا غير ..
و هي أنا متصل من الخط .. و السرعة 115 كيلو بايت لأن متصل بالبلوتوث مؤقتا بس مشان المنتدى ..
و مبسوط أني رجعت للحياة ..
بس اتعلمت ...
الشركات الخاصة صحي أغلى بكتير .. بس كلشي حقو فيه ..
و تحياتي
و إن شاء الله كلكم بصير عندكم خطوط سريعة جداً و بترتاحو من هم فتحت الصفحة أو بدها ساعة لتفتح ..
و باركولي بالرجعة
اشتقتلكم كومايات كومايات