طريقة عمل نسخة أو صورة عن الويندوز xp تعمل على أي كمبيوتر

السلام عليكم و رحمة الله
من المعروف أن عمل نسخة ( image ) أو صورة عن الويندوز XP أنها لا تعمل إذا اتغيرت عليها البورد أو أحيانا المعالج .. لأن أساساً مجرد تغيير قطعة هامة من قطع الجهاز سوف يتسبب بظهور شاشة زرقاء في النظام و عدم إقلاعه ..
لذلك و بعد القيام بالأبحاث و صلنا الى مفاجأة لم تكن متوقعة !!

من السهل عمل نسخة XP مع كل البرامج و يمكن أن تعمل على أي كمبيوتر بإختلاف القطع !!
و بعد ما تنزل النسخة عالكمبيوتر .. بيضل عليك التعريفات فقط ( تنصيب النسخة في هذه الحالة سيأخذ ربع ساعة حد أقصى ! مع البرامج )..
لاحظت :
بعض البرامج ما اشتغلت .. مثل الـ ACDSee 4 و الاصدارات اللي بعدو كللها.. لسا ما بين معنا غيرو ما اشتغل .
أما الكاسبر فاشتغل مع التحديث اللي كان نازل وقت عملنا الصورة .. و كذلك الأفيرا !

قبل ما نكتب الطريقة .. رح نقول كيف دورنا عالحل .. مشان الإفادة :

مرة كنت قاعد على كمبيوتري و مبسوط ..
جبت برنامج الأتوكاد 2008 و للأسف طلع بطييييييء .. شو الحل !
قررت حدث الكمبيوتر .. أكيد رح اضطر غير البورد .. !
النظام عندي XP و كلشي موجود رح يطير ..
لذلك بحثت عالانترنت عن سبب أنو الـ XP بيحنتر ( يعني بيزعل ) لما بتغير البورد أو لما بتغير شي مهم من قطع الكمبيوتر .. و طلع السبب أنو هذا نوع من الحماية لسرقة النسخة ..
و الحل أنو في برنامج أسمو Deploy بيحل هالمشكلة .. لكن أنت مضطر تدخل مفتاح المنتج مرة ثانية و كمان لازم تعبي البيانات كللها من جديد مثل اسم المستخدم و الشركة و هالإعدادات اللي بتطلع لما بتنزل الـ XP بعد الفورمات .. !! ( ما مشكلة طالما بيرجع متل ما كان النظام قبل تبديل البورد .. البرامج نفسها موجودة و شغالة و الأمور تمام .. ما مضطر ارجع نزل المليون برنامج النازلين مرة ثانية .!
الأعجب من هيك أنو البرنامج موجود عالسيدي مع نسخة الاكس بي !!
استخدمت البرنامج و مشي الحال ..

هلأ الطريقة و الشرح ..
منفوت عالسيدي اللي نزلنا منه الويندوز أكس بي و عالمجلد Support .. منلاقي ملف أسمو Deploy عبارة عن ملف خزنة مضغوط ..
منفك الضغط و منعمل مجلد وين مكان و منحط فيه هالملفات ..
منشغل البرنامج اللي أسمو SYSREP من المجلد .. منحط كل إشارات الصح تحت ما عدا :
Don't regenerate SID
و أهم شي ما نشيل إشارة الصح من عند الـ Mini Setup
تحت بيكون مكتوب Shutdown وهو منشان يطفي الكمبيوتر بعد أبيخلص البرنامج شغلو .
آخر شي منكبس على زر Resale ..
بتطلع رسالة أنو "" أنت بدك تعمل Regenrate لمدري شو (هي اللي ما حطينا إشارة صح قدامها) و هذا بتعملوا بس لما بدك تعمل Image للنظام "" ..
منقللو موافق ..
و بيطفي الكمبيوتر ..
هلأ منقلع من سيدي الإقلاع و منعمل صورة عن النظام ..
و أهلا و سهلا .. صار عندك صورة لنسخة XP بتشتغل على أي كمبيوتر .. تقريباً ..

ملاحظة .. بعد أبتعمل Resale إذا قلع النظام رح يطلعلك الـ Mini Setup و لازم تعمل صورة عن النظام بعد ما يطفي الكمبيوتر بعد الزر Resale و إلا بدك ترجع من الأول ..
حيث الصورة كلما بتفردها على جهاز رح يطلع هذا الـ Mini Setup و بتعبي البيانات ..
و بعد ذلك بيعمل إعادة الاقلاع و بتفوت عالنظام بشكل عادي .. يبقى عليك التعريفات .

مشاكل واجهتني :
- الـ Mini Setup لسا ما بيكون اتعرف على الفارة أو الكيبورد الـ USB لذلك لازم تكون عم تستخدم فارة أو كيبورد PS2 حصراً منشان تقدر تكبس عالزرار ..
- إذا عملت النسخة الأصلية للنظام على كمبيوتر فيه معالج Intel ما رح تشتغل على كمبيوتر فيه معالج AMD و لكن العكس غير صحيح .. فالنسخة المعمولة على الـ AMD اشتغلت على كمبيوتر Intel
- عالهاردات الـ Raid و الـ AHCI هالطريقة ما بيمشي حالها ..
- إذا كان في تعاريف نازلة بالنظام فقد يحصل تضارب عند نقل نسخة النظام إلى كمبيوتر آخر بغير مواصفات , خصوصاً في الأجهزة الحديثة اللي فيها كرتين شاشة واحد لتوفير الطاقة و الثاني للأداء العالي .
- الـ ACDSee ما رضي يشتغل بعد هالحركة أبداً .

المزيد ؟

يجري العمل بشكل دائم لتطوير نسخة نظام تعمل حقاً على أي جهاز كمبيوتر سواء لابتوب أو غيرو , و تم حل معظم المشاكل تقريباً , و تم الوصول إلى نسخة نظام كالتالي :
- لا تتأثر بنوع التوصيل للهارد , SATA - PATA - RAID - AHCI !
- ما فيها برنامج ACDSee خخخخ
- تعمل على أي نوع معالج , جربت على Intel - AMD - Via
- تبديل وضعية توصيل الهارد في اللابتوب من IDE إلى AHCI أو بالعكس لا يسبب عطل نسخة النظام هذه .
- أحدث البرامج مع إمكانية تبديل اللغة بين العربية و الانكليزية والفرنسية مباشرة
كيف ؟ هالحكي للقسم الخاص و ليس للنشر .

الموضوع موجود في ساحة محترفي الصيانة الخاصة

تحياتي
علاء

مستر جي تي المحترم تحية طيبة أما بعد :
طريقتك حلوة كتير بس حسب معلوماتي و طبعاً عم حكيك عن تجربة أنا عندي نسخة الكوست 15
بتسحب كافة البرامج نظامي 100% و صدقني أنا منزلها على أكتر من 15 جهاز من حوالي أكثر من 6 شهور و النسخة تعمل نظامي و بدون اي مشاكل
و إذا بدك النسخة هي موجودة على موقع
www.isohunt.com
طبعا تحميل تورنيت
و مرة ثانية مشكور كتير على المعلومات القيمة اللي أكيد رح نستفيد منها في حال حدوث اي مشاكل
و الله يعطيك العافية

مشكور أخي كتير
بس الفكرة كالتالي :
لنفرض أنو عندك سيرفر في شركتك .. السيرفر يستخدم ويندوز أكس بي أو ويندوز سيرفر 2003 ..
عندك خمسين كمبيوتر في الشركة ..

الله وفقك و تطورت الشركة و صارو 200 جهاز ..

السيرفر ما رح يتحمل .!

أنت مضطر تحدث السيرفر

لا تقلي رح تعمل فرمتة و تنزل النظام من أول و جديد على السيرفر الجديد و تعطل شغلك يومين !
بدنا حل سريع
و أكيد نسخة النظام ما رح تشتغل على الكمبيوتر الجديد ..
بفرض أنو عم نستخدم الجوست 15 . اللي أنا ما حبيتو . عم بستخدم 11.5 بيشتغل من الويندوز .
عملية تغيير البورد على النظام عم تتسبب بتوقف عمل النظام .. و هي كل المشكلة اللي عم نحلها ..

على كل شكلك متقدم في الصيانة , شو رأيك أعطيك صلاحيات متقدمة للدخول إلى القسم الخاص و تفيدنا و نستفيد منك

مع التحية

السلام عليكم :
يا سيدي الكريم حكيك مظبوط 100% يكمن أن بلأول ما فهمت الفكرة صح المثال اللي طرحتو صحيح تماما
و على كل حال متل ما بقول المتل عيش كتير بتشوف كتير ... يعني الكمبيوتر هو بحر من المعلومات و لسى ناقصنا كتير ... و هاد الشي اللي خلاني أطلب تقسيم المنتدى لأقسام مشان الاستفادة من بعضنا البعض ... أما بالنسبة لموضوع الصلاحيات أنا بشكرك على الثقة الممنوحة كتير الشكر بس انا موظف في الجامعة وبشتغل بعد الظهر كمان و بتعرف الوقت ما دائما بساعدني على الدخول ايمت مابدي و مرة تاني أنا بشكرك جزيل الشكر .
عبد الله