العنف في الوجدان السوري

من طرف **ثائر** 19/8/2010, 4:45 am

العنف منذ الصغر

أول درس في العنف لما كنا صغار هو غرفة الفيران...وكانت أول درس في ثقافة العنف المكتسبة .. الغرفة الوهمية إلي كانو يهددونا فيا بالمدرسة يعني كلام الانسة إللي بدي أسمعو عم يحكي بدي حطو بغرفة الفيران

كمان العنف النفسي اللي كان يمارس من قبل الأهل

يعني الكلمات اللي كنا نسمعا دائماً

مثلاً : والله لأفرمك - والله لكسرك - بدي كسر ايديك - بدي اقبرك - بدي أهري نعمتك - اذامابسلخ جلدك عن عضمك ..................الخ

في مصطلحات عنف كانت تعتمد على الطب

والله لشيل عيونك - والله لطير راساك - يشوفك الحكيم ويهز براسه - والله لأقرف رقبتك وحملك ياها - والله لأقص عصبك ( أو لسانك أو إيدك ) لا فرق

في عنف مشتق من الكلام الوطني

والله لأطرأك كف خلي سنانك تمشي مسيرة قدامك

في عنف مشتق من الحيوانات

والله لخليك تقاقي ماتلاقي - والله لخليك تعوّي متل الكلاب

وفي عنف رومانسي

والله لفرجيك نجوم الضهر اللي صارت معروفة عنا أكتر من نجوم الليل

في عنف دبلوماسي أكيد عرفتوا

هو هديك اللحظة اللي بيجي فيا الوالد الكريم حامل معو صحن سيكارتو وبيقلنا: تعال بابا نتناقش بهدوء اعتبرني رفيقك

وبغباء الابن المعهود منصدق وعند أول اختلاف وجهة نظر بيناتنا"طبعاً بابا"وبس نقول :بس يا بابا هدا رأيي....

بيطفي الوالد سيكارتو وبيطفي وجهة نظرنا بكلمة وحدة ولاك "...."صار عندك وجهة نظر !! سماع ولا نص نصيص

كبرت لما صغرت .. طلعت لما نزلت .. بضلك تحت هالـ"...."و مابيمشي غير اللي أنا بقولو أوم ولا !! جيل اّخر زمن .. والله عال

حتى صار عنا عنف باعترافاتنا العاطفية

يعني اذا حبينا حدا منقلو.. تقبر قلبي - تطلع على قبري وغيرو كتير من

المفردات الي مليانة عنف

قريت هاد الايميلو تذكرت انو من يومين بالشغل تناقشنا حول الفكرة التالية: الغنية الي بتقول: يلا تنام ويلا تنام لدبحلك طير الحمام

تخيل انك عم تنيم ولد صغير عالغنية فيا دبح حمامة و بعدين ما منكتفي بانو نقلو ادبحلك طير الحمام رح نقلو روح يا حمام لا تخافي انا عم اضحك على **** يعني منبلش بالدبح و مننتهي بالكذب و المراوغة

المصدر ايميلي

من طرف **الأصيل** 20/8/2010, 6:11 pm

يعني والله مابعرف شو بدي قلك ثائر
بس التقيم كتير رائع
عنف حيواني عنف رومانسي عنف سياسي عنف طبي
رائع جدا

من طرف **روميو** 20/8/2010, 11:43 pm

العنف موجود بكل زمان ومكان
العنف في الوجدان السوري منذو القديم
بسب الموقع الانها كانت الخط الاول ضد روم في الشمال منذ العصر الاسلامي

الى يومنا هذا يولد العنف منذ الاستقلال ولانه بلد موجه

لو البلد سوريه موقعه غير الموقع هاد لاحظة الفرق بشكل كبير

موضوعك حلووووووووو مشكور اخوي
دومتم بوووددد........

من طرف **ثائر** 21/8/2010, 2:38 am

الأصيل كتب:يعني والله مابعرف شو بدي قلك ثائر
بس التقيم كتير رائع
عنف حيواني عنف رومانسي عنف سياسي عنف طبي
رائع جدا

مشكور صديقي انت الرائع

من طرف **ثائر** 21/8/2010, 2:39 am

روميو كتب:

العنف موجود بكل زمان ومكان
العنف في الوجدان السوري منذو القديم
بسب الموقع الانها كانت الخط الاول ضد روم في الشمال منذ العصر الاسلامي

الى يومنا هذا يولد العنف منذ الاستقلال ولانه بلد موجه

لو البلد سوريه موقعه غير الموقع هاد لاحظة الفرق بشكل كبير

موضوعك حلووووووووو مشكور اخوي
دومتم بوووددد........

اهلا فيك صديقي

بس شو قصدك بانو نحنا بلد موجه

من طرف **روميو** 21/8/2010, 3:13 am

ههههههههههههههههههههه
بلد مواجهه ها قصدي

من طرف **ثائر** 21/8/2010, 3:16 am

اي احكي هيك من الاول

خليتني فكر يمين وشمال

من طرف **mariam** 21/8/2010, 3:31 am

تعرف يا ثائر هو المفروض يكون الموضوع باسم العنف فى الوجدان العربى
لأن نفس المصطلحات تقريبا موجودة فى كل البلاد العربية مع اختلاف بسيط فى الالفاظ
لذلك تجد الشعوب العربية تربت على الخوف الدائم من كل شىء
نتيجة هذه المصطلحات التى تعم المجتمع العربى
ونتيجة لهذا العنف الوجدانى انتشرت الصفات السيئة فى المجتمعات العربية
واشهرها الكذب حتى على انفسنا للهروب من الواقع
مشكور ثائر على الموضوع الرائع والمميز

من طرف **rahma** 21/8/2010, 4:19 am

بتعرفو قال شر البلية مايضحك

ضحكت انا وعم اقرأ الكلمات

وحتى لما واحد عم يقول لحبيبتو تقبر قلبي

عنجد عنجد شي بضحك

بس في شي من جوا بوجع

انو نحن من وقت ما منوعة وعم يخوفونا

شكرا ثائر موضوع مميز

من طرف **ثائر** 21/8/2010, 4:21 am

اهلا فيكي مريومة

انتي الرائعة والمميزة بمرورك

بس بالنسبة لعنوان الموضوع انا سوري وما فيني احكي غير عن الشي اللي عايشه وشايفو

يعني عن سوريا وبس

ع فكرة مريم ردودك مميزة لانو ما بتقتصر على الشكر وبس
وانما بتحتوي على نقاش مميز

من طرف **ثائر** 21/8/2010, 4:21 am

rahma كتب:بتعرفو قال شر البلية مايضحك

ضحكت انا وعم اقرأ الكلمات

وحتى لما واحد عم يقول لحبيبتو تقبر قلبي

عنجد عنجد شي بضحك

بس في شي من جوا بوجع

انو نحن من وقت ما منوعة وعم يخوفونا

شكرا ثائر موضوع مميز

بس حلو الواحد يكون بخاف

لانو اللي ما بخاف ما ممكن يكون قوي

من طرف **كليوبترا 1992** 16/11/2010, 2:32 am

والله معك حق اي نحنا وكبار بيقولوا ومنفزع كيف الولا اي لما اختي لتقولها انا بفزع....

من طرف **صلاح الدين** 17/11/2010, 4:39 pm

مشكور أخي ثائر .. موضوع رائع .. ومثل ماذكرت أختنا مريم أأكد لك أنه موجود عندنا في السعودية

كلمات ترهيب تنعكس على الطفل مستقبلا .. فمثلا عندما يسمع ترهيبات عن القط يكبر ويظل في نفسه خوف من القط لا يلمسه ولا يقترب منه رغم أنه أليف وهذا حاصل وعلى سبيل المثال لا الحصر .

أما أنشودة النوم للأطفال فعندنا يقولوا ( يا كلب غشان , تعال من الشام ( طبعا كلمة الشام عند كبارنا تعني المكان البعيد ) وكل عقيلة وخلي (اسم الطفل ) يعني أحسن من ذبح الحمام lol