المعوقين في سوريا

والله ياجوري حطيتي ايدك على الجرح

اين اماكنهم وشوارعهم ووسائل نقلهم



يعني بزيارة الي من سنة لسعودية لما كنت عم اعمل عمرة

كان بالباصات في اماكن معينة للمعوقين ومن دون اجرة اتصوري

وطريق خاص الون
ودرج خاص فيهن

يعني كلشي غير

ام هون مافي شي

هلا رورو بيسعدني تكوني اول المارين على هالموضوع
اللي بعتبرو كتير مهم
المعوقين ووضعهم شيء محزن للغاية
بكل بلدان العالم الهم وضع خاص ومعاملة خاصة الا عنا كمان الهم وضع خاص بس على طريقتنا
كتير من المدارس العادية بترفض تسجيل طالب معوق وهون نحنا منحط اول عثرة بطريق هالشخص
ومنحرمنو من الاندماج في المجتمع ومنحرم المجتمع من تقبلو كشخص عادي بيناتنا
طبعا بتبلش نظرات الشفقة تلاحق المعوق وكانه اجى من كوكب تاني
رح اكتفي بهذا القدر ولي عودة لمناقشة
اين هم من شوارعنا؟؟

ممممممممممممم
موضوع صعب
أولا شو قصدكم بالمعوقين ؟
اللي عندو أعاقة ذهنية مثلا ؟
هدول غلط ينحطو بالمدارس العادية لأن رح يتأذو من أنو رفقاتن أذكى منن
و لازمهم تعليم خاص لأن بدن أهتمام أكتر من غيرن ..
إعاقة جسدية ؟
في بسوريا أكتر من 15 مدرسة مخصصة لألن .. و ألن نشاطات كتيرة .. لكن الإعلام عنا متل الـ
و بسبب الضعف الاعلامي فإن معظم هالنشاطات ما منسمع فيها غير بالصدفة
....
أما سبب اختفائن من الشوارع فهو عائد للأهل أول مرتبة لأن هنن اللي بيدفعو ابنهم المعاق لينطلق بالحياة
بس لما بيكونو خايفين عليه و بيحبسوه بالبيت أكيد ما رح نشوفو و رح تنتزع نفسيتو ..
....
وسائل نقل للمعوقين ؟
قصدك المعوق جسدياً ؟؟
في ألن مواقف خاصة و سيارات خاصة و منتشرة و عليها العلامة ..
صحي في عالم بتستخدمها بشكل غير مشروع
لكن ألن أماكنهم بين وسائل النقل
و بالسوق و بكل المناطق اللي صلحو الرصيف فيها بحمص عالأقل في أماكن مخصصة للمعوقين ينزلو و يطلعو منها ..
إذا لاحظتو عند كل ممر مشاة في مكان مخصص متل هاد للمعوقين
و العالم بس تلتزم بممر المشاة بتصير تشوف المعوقين
....
و بالنسبة لألي كانسان معاق (ربما تتفاجأو أني مصاب بإعاقة ؟؟ ) فأنا ما
كنت متمنى أني ضل يوم بالمدرسة و كرهتها لأن كان اختيارها غلط و لكن ما في
مدرسة للي متلي
بالنسبة لألي فأنا من النوع اللي ما بيقدر يحفظ شيء بسهولة .. حتى وجوه
الناس و أسمائهم فالأمر صعب علي و أنا بحاجة لمقابلة الشخص لأكثر من 10
مرات لأحفظ أسمو أو اقعد معه أكتر من 10 ساعات .. و هذه تعتبر إعاقة من
بين الـ 10% السوريين ..! !
و ما بحب اطلع لأن كتير عالم بتسألني السؤال نفسو : يا زلمي لحقت تنسانا ؟
طيب أنا ما وصيتك عالشغلة الفلانية ؟ ههههه ... لذلك هربت من الشارع ...
و معاناتي بالمدرسة كانت لأن المنهاج صاير عبارة عن حفظ بصم .. حتى بالفرع
العلمي ... معروف أنو صار للحفظ البصم أكتر من الفرع الأدبي ... ههههههه
.......
و بالفعل أنا عم بكتب الرد و متردد أرسلو لأن متوقع نصوص شفقة أو ما شابه .. ! ههههه
بس رح كون شجاع و ارسل ..
.....
على كل في بوادر اهتمام ..
أكيد ما فينا نطالب بكلشي يصير دفعة وحدة .. نحنا محاربين من الخارج لذلك
فالتطور الداخلي ما رح يكون بالسرعة اللي نحنا متوقعينها .. و من ناحيتي
ما بدي نصير متل أوروبا بيوم وليلة لأن ساعتها رح يخرب المجتمع عنا بيوم
وليلة ..

تحياتي

طبعا انا ما بقصد اللي عندو اعاقة ذهنية
انا بقصد الاعاقة الجسدية
ليش ما بنخرطو بالمجتمع ؟
يعني ليش ما بيدخلو بالمدارس العادية
صحيح الن مدارس خاصة بس هيك نحنا عم نعزلن اكتر
ومشان الشوارع مؤخرا صارو يحسبو حسابن بالشوراع اما قبل لا تقلي انو كان في هيك شي
اما بالنسبة لوسائل النقل ؟؟
يعني كل معاق عندو سيارة ؟؟
ما رح علق على موضوع وسائل النقل كتير ورح اكتفي بالسؤال المذكور مسبقا
اما بالنسبة الك يا جي تي
انا باكدلك انو هي مو اعاقة
وبتمنى منك انو ما تحط هالشغلة براسك
لانوماشاء الله عنك ذكي وعين الله عليك وكلمة ذكي مو مجاملة واكيد انت بتعرف اني ما بجامل
ومشان النسيان فالكل بينسى
وانا اول وحدة بنسى
في كتير ناس بشوفن بكون متذكرة شكلن بس ما متذكرة الاسم
يعني بتصير مع الكل
فلا تحط هل الفكرة براسك
وكتير انبسطت بسماع رايك
نورت مديرنا العزيز

صح انا مع جوري بكلامها


وعلاء انا كمان بعاني من المشكلة تبعك نفسها
هههههههههههه

مشكورة جوري على هاللفتة الحلوة
و10% نسبة ماكبيرة لانو 90 % من اسباب الاعاقة سببها زواج الاقارب وهي الظاهرة منتشرة كتير عنا بالارياف
وبالنسبة للمجتمع بظن في حق عليه بس السبب بيرجع بالاول وبالاخير للاهل اللي هني من الاساس ماقدرانين يتعودوا على اولادهم بوضعهم الطبيعي
بعدين كل شيء عم يتطور وكتير شغلات صارت بتنحل
وبالنسبة لسؤالك انا بنظرلهم نظرة عادية ومابحب نحسسهم انو في بقلبنا شفقة لحتى هالشي مايدايقهم
المجتمع ينظر بقسوة احيانا
بس لو انو الاهل بيعطوهم ثقة وبيخلوهم يشوفوا ناس اكتر كان صار عنا الموضوع طبيعي

وبالنسبة الك مستر جي تي ضحكتني كتير لانو مافيك شي
النسيان عند كل الناس طبيعي كتير
ومافي داعي تعتبر حالك معاق لانو هالشي كتير غلط

محبتنا الغالية نورتي
وانا معك بكلامك البداية من عند الاهل لانو هنن اول خلية لازم ينخرطو مع المعاق ويتقبلوه
ويوصلو للمجتمع الاكبر
مشكورة على مرورك العطر

بالنسبة لاهتمام بالمعوقين جسديا

فالمستر الله يعطيه العافية ما خلا شي الا وحكاه

وبضيف انو من جديد سمعت انو في منظمة سورية مختصة بالمعوقين واحتياجاتهم وعلى الاغلب اسمها امال

اما من ناحية التغطية الاعلامية والبرامج المخصصة للمعوقين

فبذكر انو كان في برنامج يطلع على القناة التانية بالتلفزيون السوري اسمو مجلة الامل وهو مخصص للمعوقين

وكان اكثر من رائع لدرج كان يستقطب الاصحاء قبل المعرقين

بس ما بعرف شو صار فيه هلأ

أصدر السيد الرئيس

بشار الأسد

القانون الخاص بالمعوقين في 18/7/2004 وشمل القانون جوانب كثيرة أنقل منها

سادساً¬ في مجال الإعفاءات والخدمات: ‏
1 تعفى من جميع الرسوم الجمركية مستوردات الأجهزة الخاصة حصرا بالاستخدام الشخصي للمعوق وتحدد هذه الأجهزة بقرار من رئيس مجلس الوزراء بناء على اقتراح الوزير. ‏
2 يعفى المعوق من رسم الطابع في جميع معاملاته الشخصية مع الجهات العامة. ‏
3 يعفى المعوق من رسم دخول الأماكن العامة الأثرية والثقافية. ‏
4 يجوز صرف إعانات مالية للأسرة الفقيرة التي تتولى رعاية المعوقين الذين لديهم شلل دماغي ويحدد مقدار الإعانة بقرار من الوزير بعد موافقة وزير المالية. ‏
5 تعفى مشاريع الجمعيات التي يتبرع المهندسون بتنفيذها مجانا من الرسوم والأتعاب الهندسية. ‏
6 يمنح المعوق ومرافقه وفق نوع الإعاقة وما يرد في بطاقة المعوق تخفيضا بنسبة 50 بالمائة في وسائل النقل العامة الجماعية البرية والبحرية والجوية.

ترى كم من الأشواط قطع مسؤولو التنفيذ

في تطبيق فقراته؟؟

وهذه بعض استفسارات المعوقين

أحدهم
رد: القانون الخاص بالمعوقين في سورية
ارجو انشاء جمعية للمعاقين في كل منطقة لتأمين حاجيات المعوقين وارجو ان نعامل نحن المعوقين في الدوائر العامة بطرق انسانية

وآخر

رد: القانون الخاص بالمعوقين في سورية
السلام عليكم انا لدي اعاقة حركية والمرسوم نص بوظيف المعوقين حاولت البحث عن وظيفة لكنهم دائما يقولون لي بانه يجب ان يكون عندي واسطة للوظيفة سؤالي هل فعلا احتاج للواسطة حتى استطيع التوظيف وانا بحاجة ماسة لها وشكرا للاهتمام بكافة الاعاقات

وصوت معوق

رد: القانون الخاص بالمعوقين في سورية
ارجو من يهمهو الامر ان هذا القانون الصادر عن سيادة الدكتور بشار الاسد ان يطبق بكل بنوده وارجو الاعانة المالية ان تصل الى اصحابها مو كل ستة اشهر يستلم المعاق ثلاث الاف وهذا الامر من الواجب على كل من يهمهو الامر ان يصل الى المسؤلين عنه وشكرا

تخمين معوق

تطبيق القانون
تعينا بموجب المرسوم و قرار مجلس الوزراء بالعمل و لكن لم يتم تثبيتنا فاننا نشعر بانهم سوف يستغنون عن عملنا باي حجة نرجو تطبيق القانون و ذلك لنشعر بالامان بظل السيد الرئيس و السيد الاولى

""""""""""""""

متى نأخذ بأيديهم

شو جوري

شايفك لما صرتي برا صرتي تحكي متل اللي برا

شو هي عجب يا بلدي عجب

بكل مكان بالعالم في فساد وسوء تطبيق للقوانين