التوبة.......

من طرف **memo** 26/1/2011, 10:39 am

من كل حرف وكل شهوة صبابه
استغفر الله واتعوذ من ابليس

اعوذ باللي آوى عبد وسرابه
لا اجي نهار الحشر خلف امريء القيس

يارب .. يارب الكرم والمهابه
ياللي لك اعلام الاوادم مناكيس

جردني من النابيه والسبابه
ولبسني من دروع هديك متاريس

تعبت من مسك القلم والكتابه
والشعر وفتن النساء والاباليس

والمدح في عزوه وشيخ وقرابه
والا لدعوات الرضيين والليس

والحب وما حوله وماله وهابه
والدمع لاهبت علي النسانيس

والشوق وغفال العقل وانغلابه
والليل وخطط الدهاء والجواسيس

وحصر اسمي فشاعر فساحة غرابه
شعارها فيهم رخوم وملاحيس

وانا لعطاش الاوادم سحابه
ومن خلقتي ماقد وطيت الدنافيس

تاكي على ارث الاسم بالنيابه
واقطف خلاصة ما اغرسوه الغواريس

احسبني فايز بالرضا والذرابه
واثري مثل من يحصر النور في كيس

اقفي من الله والامل والرضا به
واروح ادور من ورا ابليس احاسيس

اسهر على فن الكلم والخطابه
واصبح ولين اللي جمعته حماليس

قلبي لعزاف الاوادم ربابه
وراسي لخطوات الشطانه دواعيس

تقودني نفسي ولا اشعر ولا آبه
مالت عليها عاصيات الهواجيس

من عنده ان كل الشعور يتشابه
روس مع اللي في الدحادر مراويس

الاثم ماحاكه في خفوق وخفى به
والخير ماشاعته روس النواميس

كم شي صار وصار ما يندرى به
وكم نومة ما كدرتها كوابيس

ترى ما احد له في رقبتي طلابه
بس الصراحه من شم الفواعيس

والرجل اذا ما يعتبر في شبابه
يعيب قبل يشيب ويشيب ويخيس

يا راجي ارجي اللي ما ينصك بابه
لا ترجي الوهبات من هيس ابن هيس

استغفر الله واتتقى عذابه
اللي فرقني عن حياة المتاعيس

من قبل لا اعرف الهدى واعنى به
انا وهمي والحزن FACE TO FACE

والحين لله الفضل والانابه
متعافي ويمشي على زندي التيس

هادي .. يشوشني طزيز الذبابه
لاعد لايام الغبيه ولا اقيس

شريت عقلي في سؤال واجابه
انا اعبد الله والا اعبد الوساويس ؟؟

لذة خفوقي وانجلاية ضبابه
سجدات ليل ظالمينه مناعيس

فاجواء مكه والحرم والرحابه
لا يا بعد روما ولندن وباريس

هذي ديار المصطفى والصحابه
وهذيك دار ابليس وعويّل ابليس