الأم والشهيد

الأم والشهيد
******

{الشهيد}----شيلى الدموع يا امّة من على خدودك
دا اِبنك شهيد الأمل –ولا يِنتنى عودك
زاد النعيم ياامّة—مادد لمولودك
******
{الأم}-------يانور عيون ماما—ياكلّ أحلامى
يامنحة من ربّى –فى مُرّ أيامى
إنت اللّى كنت الأمل---وكلّ أنسامى
*****
{الشهيد}----ياحبيبتى يا أمّى ووصية الرحمن
إيدك شالت همى—وبددت الاحزان
ياما فى أحضانك—شفت الحنان ألوان
****
{الأم}------أفرح أنا ياابنى ولاّ دموعى تِسيل
تِجرى على خدودى—والآه تشق الليل
ع اللّى اِنخطف مِنّى---وسابنى قلبى عليل
******
{الشهيد}-------ماتِبكى يا أمّى انا بقيت إنسان
رايح فداء وطنى—ل جنة الرحمن
فوق الميدان ياامّه---روحى أنا بتطوف
تِدعى على الظالم—وتدعم الملهوف
معايا من صحبتى—شهدا ماعرفت خوف
طرنا ياأمّى سوا –ووعد ربّى نشوف
روحى بإذن الحقّ—تهتف مع الثوّار
تنثر عليهم فُلّ—والحب والأزهار
هُمّا حُماة الوطن---واالفارس المغوار
همّا دعاة الأمل---والحلم فى المضمار
******
{الأم}----إنت ياشوق دربى---حبيبى وضنايا
إسمك سكن قلبى—منّى وجوّايا
والله باشتاقلك---وحشانى ضِحكاتك
وواحشنى لمتنا---فى البيت مع اخواتك
ليه الظلام يطويك---وانده عليك ماالاقيك
أفرد عليك شالى—وانت تقول لبيّك
فجأة نيران الغدر—تِرمى شرورها عليك
لكن عزاء أمّك---إن الكريم يحميك
بكوثر الجنة—وتلمسه بإيديك
*****
{الشهيد}-------سامحينى ياأمّى—رُحت الميدان من غير
مااودّعك ياامّة—ولاقلت لك تفسير
لكن لقيت بلدى—تِنده وانا لبّيت
لاجلّن نحرّرها—ويرحلوا الطواغيت
خرج الشباب ملايين—من كلّ حِزب ودين
حالفين يِمين يا امّه---مصر تكون فى العين
لَكن فلول الغدر---غارت على الشُبّان
تِرمينا ياأمّى—بالظلم والدخان
بصدورنا واجهنا—واللّى اِنكتب لى كان
من أوّل المبتدا---مِسجّلّه الرحمن
أبقى فى لحظة شهيد؟--يارب يامنّان
******
{الأم}-----مبروك عليك الشِهادة –ياابنى ونور عينى
بادعى وربّى مُجيب---الصبر يِعطينى
تمن الشهادة كبير---حِماية الوادى
ياما رِجال رحلت—شهدا فِدا بلادى
لاجل البحور تِبتسِم-----والنيل يسير عادى
يارب نبقى سوا---يارب يا هادى
يارب ياهادى